Gweithdy

Bydd y gweithdy hwn, sy’n cael ei arwain gan Stefan Fafinski, prif weithredwr 1871, arbenigwyr ymchwil e-Drosedd, yn canolbwyntio ar gyfyngiadau difrifol cyfraith genedlaethol wrth ymdrin ag e-Drosedd.

Bydd yn archwilio’r bygythiadau presennol a’r rhai y gellir eu disgwyl gan e-Droseddwyr ac yn cymharu hynny gyda'r fframwaith gyfreithiol bresennol sydd ar gael i ymdrin â nhw.

Bydd yn canolbwyntio ar sut mae natur lyfn a rhyngwladol e-Drosedd yn gallu rhwystro asiantaethau cenedlaethol gorfodi’r gyfraith sydd yn aml â dim ond deddfwriaeth benodol iawn sydd wedi’i chyfyngu’n ddaearyddol at eu gwasanaeth.  Mae swyddogion yn ei chael yn anodd casglu tystiolaeth dderbyniol ar gyfer y llysoedd, mae diffyg gwybodaeth arbenigol, amharodrwydd ymysg dioddefwyr i adrodd ar droseddau o’r fath ac mae’n anodd sicrhau'r cydweithrediad rhyngwladol angenrheidiol i erlid troseddwyr y tu allan i’w hawdurdodaeth.

Bydd y gweithdy’n edrych yn fanwl ar sut mae'n rhaid cyfuno’r gyfraith ddomestig gyda chydweithrediad rhyngwladol, hunan reolaeth a datblygu set newydd o safonau cymdeithasol er mwyn gallu rheoli gweithgaredd rhyngwladol ar lein yn effeithiol.

Er mai troseddwyr o’r tua allan sy’n gyfrifol am lawer o fygythiadau i e-Ddiogeledd pobl, yn aml mae aelodau o staff sy’n gallu mynd i bob rhan o rwydwaith y cwmni hefyd yn gallu bod yn beryglus. 

Nid yn unig mae yna ddigonedd o gyfle i weithwyr anfodlon ddifrodi’r system ond, gyda'r nifer cynyddol o gyfryngau symudol grymus, megis gyrwyr pen ac iPods - mae mwy fyth o gyfle i bobl o’r tu fewn i sefydliad ladrata data sensitif, ac, o bosibl, ei werthu i gystadleuwyr  Ymhellach mae camddefnydd syml o’r rhyngrwyd yn ystod oriau gwaith – er enghraifft treulio oriau ar Facebook – yn gallu costio’n ddrud i gwmni mewn amser a cholli cynhyrchu.

Bydd y gweithdy hwn yn archwilio’r holl fygythiadau a’r problemau ac yn cynorthwyo busnesau i ddatblygu polisïau TG a fydd yn eu hamddiffyn yn erbyn y risgiau mewnol hyn.

Mewn cyfnod lle mae mynediad Band Eang i’r rhyngrwyd ar unrhyw adeg, mae busnesau’n gallu dioddef ymosodiad 24 awr y dydd ac mae e-droseddwyr yn gallu chwilio am wendidau mewn amddiffynfeydd TGCh cwmnïau ddydd a nos.

Bydd y gweithdy’n egluro sut y mae waliau tân yn gallu rhoi peth amddiffyniad a bydd yn rhoi gwybodaeth werthfawr ar sut y mae hacwyr yn gallu treiddio trwyddynt. 

Bydd yn canolbwyntio’n benodol ar sut y gall busnesau gyfuno a ffurfweddu waliau tân i wneud eu hunain mor anghroesawgar a phosibl i ‘dresmaswyr’ ar lein a sicrhau fod eu hamddiffynfeydd yn dal i allu lladd firysau a bygythiadau newydd eraill.

Mewn economi’n seiliedig ar wybodaeth, mae data’n ganolog i’r rhan fwyaf o fusnesau a gallai colli’r data hwnnw achosi trychineb deublyg o golli enw da ac amharu, os nad chwalu’r busnes.   Er gwaethaf hyn, dangosodd arolwg ddiweddar mai dim ond traean o gwmnïau yng Nghymru sy’n cadw eu data oddi ar eu safle.

Bydd y gweithdy hwn, yn cael ei arwain gan Richard Hollis, Prif Weithredwr Ewrop cwmni ymgynghorol diogeledd gwybodaeth Orthus Cyf, yn archwilio ffynonellau risg i ddata a goblygiadau colli data - yn enwedig gwybodaeth gyfrinachol ynghylch cwsmeriaid - o ran atebolrwydd cyfreithiol a pharhad y busnes.

Yn bwysicach, bydd yn archwilio’r technegau ymarferol a syml sydd ar gael i asesu’r risg a sicrhau diogelwch data, er enghraifft drwy gyfyngu ar fynediad staff at rai mathau o ddata ac amgryptio gwybodaeth sensitif. 

Yn ei hanfod, defnyddio’r rhyngrwyd i wneud galwadau ffôn yw Protocol Llais dros y Rhyngrwyd ac mae’n cynnig manteision mawr o ran lleihau costau seilwaith a gosodiadau a gallu gwneud galwadau ffôn rhyngwladol hynod o rad. Fodd bynnag, mae rhai risgiau sylweddol y mae'n rhaid i’r defnyddiwr eu rheoli er mwyn gwarchod ei hunan.

Bydd y gweithdy’n edrych yn benodol ar sut mae galwadau fel hyn yn gallu dioddef o fygythiadau traddodiadol megis pobl yn gwrando a chael gwybodaeth sensitif neu hyd yn oed recordio galwadau a thresmasu mwy fyth ar breifatrwydd.

Bydd yn edrych ble mae pobl yn fwyaf tebygol o ddioddef y bygythiadau traddodiadol - megis pryd y maen nhw’n cysylltu gyda’u gwasanaeth bancio ffôn - ac yn dangos sut y gallan nhw gymryd camau syml i ostwng neu ddileu’r risg.

Mae twyllwyr ar lein yn dod yn gynyddol soffistigedig ac, wrth i bobl ddod i ddeall eu triciau, maen nhw’n datblygu ffyrdd newydd o ennill eu hyder.

Bydd y sesiwn hon, sy’n cael ei arwain gan Reolwr Gyfarwyddwr Get Safe Online, Tony Neate, yn edrych ar y dulliau sy’n datblygu sy’n cael eu defnyddio gan dwyllwyr er mwyn cael gafael ar fanylion personol megis enwau defnyddiwr a chyfrineiriau. Bydd yn archwilio’r defnydd cynyddol o beirianneg gymdeithasol i dwyllo dioddefwyr fod popeth yn iawn gan arwain at ladrata adnabyddiaeth a throseddau eraill.

Bydd yn egluro’r nifer o ffyrdd y mae troseddwyr yn gallu cael gafael ar wybodaeth allweddol – gan gynnwys gwendid traffig diwifr – a bydd yn amlinellu sut y gall pobl amddiffyn eu hunain gyda rhwystrau meddalwedd ac ymarferion diogelach.