Ymunodd Ian Williams â Llywodraeth Cynulliad Cymru’n Gyfarwyddwr Busnes Rhyngwladol Cymru (BRhC).  Ian sy’n gyfrifol am reoli pob mewnfuddsoddiad i Gymru yn ogystal ag annog cwmnïau yng Nghymru i finiogi eu gallu i gystadlu trwy ryngwladoli eu busnesau.

Mae Ian hefyd yn Gyfarwyddwr Gogledd Cymru (yn arwain datblygu economaidd o fewn y rhanbarth) ac yn gyfrifol am Fenter (yn darparu cefnogaeth i entrepreneuriaid a busnesau twf) ar draws Cymru gyfan.

Mae Ian yn hanu’n wreiddiol o Fethesda yng Ngogledd Cymru ac mae’n siaradwr Cymraeg rhugl.  Mae ganddo ugain mlynedd o brofiad fel Gweithredydd Cwmni Olew Shell International. Cyn ymuno â Shell, treuliodd Ian beth amser yn Ganwr Pop ac yn Gyflwynydd Teledu yng Nghymru. Mae Ian yn briod â Nest Williams, Gohebydd Teledu gyda BBC Cymru.

Prif Gynghorydd Seiber-ddiogelwch (CSA), Microsoft Cyf, y DU

Ed Gibson yw prif lefarydd Microsoft Cyf y DU ar yr holl faterion sy’n ymwneud â’r seiberofod, uwch-dechnoleg, y rhyngrwyd a diogelwch a risg.  Cyn ymuno â Microsoft, treuliodd 20 mlynedd fel Asiant Arbennig i'r Biwro Ymchwilio Ffederal (FBI), yn arbenigo mewn ymchwilio i ysbïwriaeth economaidd, gwyngalchu arian, seiber-dwyll a dwyn eiddo deallusol.  Bu'n gweithio fel Swyddog Cyfreithiol Cynorthwyol yr FBI yn y DU am bum mlynedd.  Mae Mr Gibson yn gyfreithiwr cymwysedig, yn Gymrawd Cymdeithas Gyfrifiaduron Prydain ac yn ddarlithydd rhyngwladol, ac mae ei bwyslais ar sut y mae troseddwyr yn camfanteisio ar y rhyngrwyd a’i allu ymchwiliol yn golygu ei fod yn arweinydd delfrydol ar gyfer ymdrechion Microsoft ym maes cyfrifiadura diogel.

 Pennaeth Rheoli Risg, PayPal

Garreth Griffith yw Pennaeth Rheoli Risg PayPal yn y DU ac Iwerddon. Ei rôl yw diogelu cwsmeriaid PayPal (prynwyr, gwerthwyr, marsiandwyr bach a mawr) yn y gwledydd hyn rhag twyll, yn ogystal â chydlynu gwaith â thimau eraill PayPal ledled y byd. Mae’r rôl yn cynnwys cydweithredu â’r heddlu’n fyd-eang i ymchwilio i achosion a dedfrydu troseddwyr ar-lein. Mae tîm Materion Gorfodi’r Gyfraith yn PayPal yn cydweithredu ag erlynwyr ledled y byd, sy’n golygu bod llawer o bobl yn cael eu harestio bob mis.

Mae Garreth wedi bod un o Gyfarwyddwyr Get Safe Online ers y cychwyn yn 2004

 Mae Chris Corcoran yn frodor o Wrecsam a bu’n swyddog heddlu am fwy na 27 mlynedd gyda Heddlu Gogledd Cymru gan weithio mewn iwnifform a hefyd yn y CID. Dyrchafwyd Chris i’w swydd bresennol o Dditectif Brif Uwch-arolygydd, Comander Rhanbarthol, Adran Gwasanaethau Troseddu ym mis Gorffennaf 2006.

Fel Comander Rhanbarthol, mae Chris yn bennaf gyfrifol am gyfarwyddo ymchwiliadau i droseddau sylweddol a throseddau cyfundrefnol traws-ffin difrifol. Gweledigaeth Chris yw sicrhau fod Gogledd Cymru yn fan diogel i fyw a gweithio ynddo, ac i wneud yn siŵr fod Heddlu Gogledd Cymru’n gwneud y defnydd gorau o’r Ddeddf Trafodion Troseddol, sydd yn ymwneud â chymryd arian oddi ar droseddwyr.

Am y 6 blynedd ddiwethaf, bu Chris yn gadeirydd Grŵp Llywio Aml-asiantaeth E-Drosedd Cymru ac roedd yn un o’r prif ysgogwyr dros ei greu. Mae’n hybu cynnydd y cynlluniau gweithredu i sicrhau fod busnesau yng Nghymru yn gwybod am fygythiad e-droseddu ac yn cael eu diogelu rhagddo. Mae Chris hefyd yn aelod o’r grŵp llywio cenedlaethol ar E-Drosedd ac yn cynrychioli Cymru pan drafodir yr e-fygythiad byd-eang.

Fel prif gynrychiolydd yr heddlu ar y grŵp, mae Chris yn sicrhau fod gwasanaeth yr heddlu yng Nghymru yn gweithio’n agos gyda Llywodraeth Cynulliad Cymru a phartneriaid eraill yn y sector cyhoeddus a’r sector preifat i sicrhau’r cyngor a’r gefnogaeth gorau posibl i fusnesau bach a chanolig ledled Cymru.

 Prif Weithredwr CRYPTOCard Europe

Fel Prif Weithredwr CRYPTOCard Europe, cwmni blaenllaw sy'n gyfrifol am leihau'r risgiau sy'n gysylltiedig â chyfrineiriau sefydlog, cysylltu-o-bell a phrosesau ar y we, mae gan Jason Hart ddealltwriaeth ddofn o anghenion busnesau o ran diogelu gwybodaeth ar-lein.

Mae Jason yn gyn haciwr moesol ac mae ganddo 17 flynedd o brofiad yn y diwydiant diogelu gwybodaeth.  Mae hynny wedi'i helpu i gyfrannu at greu technolegau gwella diogelwch ar gyfer busnesau o bob math ym Mhrydain a thu hwnt.

Fel rhan o'i ymdrechion i gael pobl i sylweddoli pwysigrwydd diogelu gwybodaeth, mae Jason wedi cyhoeddi llawer o erthyglau a phapurau ac mae wedi ymddangos ar y BBC, CNN a CNBC yn ogystal â Radio 5 a BBC World News. Mae wedi cael ei ddyfynnu yn y cylchgronau Time, SC, InfoSec a Computing and Computer Weekly ac yn y Financial Times, y Guardian, y Times a'r Evening Standard.

Mae ei yrfa wedi cynnwys gweithio gydag enwau mawr fel y cwmni cyllid Ernst and Young.

Mae e' hefyd wedi creu fframweithiau diogelu a dulliau asesu diogelwch i gleientiaid fel y GIG, y llywodraeth ganol a nifer o 100 cwmni'r FTSE.

Mae CRYPTOCard wedi bod yn cynhyrchu dulliau dilysu i fusnesau ym mhob cwr o'r byd am fwy nag 20 mlynedd.

 Rheolwr Gweithrediadau e-Fusnes, Llywodraeth Cynulliad Cymru

Ar ôl cychwyn ei yrfa yn y diwydiant modurol ac awyrennau, bu Michael yn gweithio yn Llundain yn rheoli prosiectau a oedd yn dod â thechnolegau newydd i'r farchnad gyda banciau buddsoddi a chwmnïau o'r radd flaenaf.

Ers dychwelyd i Gymru yn 2001, mae Michael wedi cyflwyno amrywiaeth o brosiectau e-Fusnes rhanbarthol a Chymru gyfan trwy'r WDA a Llywodraeth Cynulliad Cymru, gyda'r nod o gynyddu nifer y busnesau ym mhob sector yng Nghymru sy'n manteisio ar TGCh.

Roedd Michael yn un o gyd-awduron cyhoeddiad eris@ “Guide to Regional Good Practice in e-Business” ac mae'n ymarferydd cymwysedig mewn Prince II a Rheoli Rhaglenni Llwyddiannus OGC. Yn dilyn datblygu darpariaeth Cymorth e-Fusnes newydd, mae Michael a'i dîm yn ceisio gwella'r defnydd o TGCh ac e-Fusnes mewn busnesau yng Nghymru gyda chefnogaeth arian Ewropeaidd newydd.

Pennaeth Grŵp Ymchwil Gwybodaeth Prifysgol Morgannwg

Yr Athro Andrew Blyth yw un o’r academyddion diogelwch gwybodaeth uchaf ei barch yn y DU.  Ac yntau’n Bennaeth Grŵp Ymchwil Gwybodaeth Prifysgol Morgannwg a GSC-CSIRT, y Tîm Ymateb i Ddigwyddiadau Diogelwch Cyfrifiadurol ar gyfer Ysgol Gyfrifiadura Prifysgol Morgannwg, mae'r Athro Blyth yn arwain prosiectau ymchwil arloesol amrywiol sy'n ystyried diogelwch system o systemau.  Mae'n addysgu cyrsiau diogelwch gwybodaeth amrywiol ar lefel Meistr yng Nghyfadran Technoleg Uwch (FAT) y Brifysgol, gan gynnwys Fforenseg Cyfrifiaduron, Diogelwch Systemau Cyfrifiadurol a Diogelwch Di-wifr.  Mae'r Athro Blyth yn cyhoeddi papurau yn rheolaidd ar bynciau gan gynnwys Systemau Canfod Ymyrraeth a Systemau Rhybudd Cynnar Diogelwch Gwybodaeth, ac mae wedi ysgrifennu llyfr o'r enw ‘Information Assurance’.

 Cyfarwyddwr Gweithrediadau, 7Safe

Dan Haagman yw Cyfarwyddwr Gweithrediadau un o brif gwmnïau diogelu gwybodaeth Prydain, 7Safe, ac mae'n gyfrifol am dîm o arbenigwyr mewn diogelwch a gwaith fforensig.

Mae'r tîm yn cynnig amrywiaeth eang o atebion i broblemau diogelu gwybodaeth, gan gynnwys profion hacio, gwaith fforensig ar gyfrifiaduron a chydymffurfio â safonau diogelu cwsmeriaid a chardiau talu i gwsmeriaid mewn sectorau pwysig fel y lluoedd, cwmnïau cyfreithiol a banciau rhyngwladol.

Mae Dan yn arbenigwr fforensig uchel iawn ei barch drwy'r byd, sy'n arbenigo mewn meddalwedd faleisus ac amddiffyn rhag 'ymwelwyr diwahoddiad'. Mae ei brofiad proffesiynol yn cynnwys rheoli 'waliau tân' a systemau darganfod tresmaswyr yng Nghyfnewidfa Stoc Llundain a chyfrannodd at raglen addysg ddiogelwch 7Safe sydd wedi'i hachredu at safon prifysgol.

Cwmni cynghori blaengar ar ddiogelu gwybodaeth a gwaith fforensig ar gyfrifiaduron yw 7Safe Information Security, sy'n cynnig amrywiaeth eang o wasanaethau arbenigol.

Prif Swyddog Gwybodaeth (CIO), Spamhaus

Mae Richard Cox wedi bod yn CIO Spamhaus er 2004, gan weithio o Benarth (ger Caerdydd) ac yn teithio i lawer o wahanol rannau o'r byd yn ôl y gofyn.  Cyn ymuno â Spamhaus roedd ei yrfa yn cynnwys darlledu (gan gynnwys BBC Television), telathrebu (gan gynnwys gwaith arbenigol i'r Undeb Telathrebu Rhyngwladol - rhan o'r Cenhedloedd Unedig) a swyddogaethau rheoleiddio gyda nifer o Ddarparwyr Gwasanaethau Rhyngrwyd y DU.

Tîm rhyngwladol o arbenigwyr ar y Rhyngrwyd yw Prosiect Spamhaus sy'n ymroddedig i leihau sbam a seiber-droseddu ar y rhwydweithiau cyhoeddus. Fe'i sefydlwyd ym 1998, gyda’i bencadlys yn y DU, ac mae aelodau ei dîm wedi eu lleoli ym mhedwar ban byd, a phob un ohonynt yn darparu gwybodaeth leol a sgiliau iaith.

Mae Spamhaus yn cyhoeddi sawl cronfa ddata i gynorthwyo Darparwyr Gwasanaethau Rhyngrwyd i benderfynu pa gysylltiadau i'w derbyn a pha rai i’w gwrthod: mae mwyafrif y Darparwyr Gwasanaethau Rhyngrwyd ledled y byd yn ymddiried yn fawr yn y cronfeydd data hyn ac maent yn cyfeirio atynt bob tro y bydd rhywun yn ceisio anfon e-bost.

 Meistr y Seremonïau ar gyfer Uwchgynhadledd e-Droseddu Cymru 2009 fydd un o brif ddarlledwyr y BBC, Jamie Owen, sydd fwyaf adnabyddus fel wyneb y rhaglen newyddion arloesol 'BBC Wales Today'.

Mae ei weithgareddau darlledu yn ystod y ddau ddegawd diwethaf yn amrywio o Songs of Praise a Today in Parliament i'r Newyddion Amser Brecwast a Rhagolygon Llongau Radio 4.

Heb y microffon, mae Jamie yn awdur llwyddiannus. Mae wedi ysgrifennu pum llyfr teithio - mae 'Magic Islands' yn sôn am y daith a gymerodd yn hwylio o amgylch yr ynysoedd oddi ar arfordir Gorllewin Prydain mewn cwch hwylio can mlwydd oed. 'Magic Harbours' oedd y fordaith o amgylch porthladdoedd Cymru, roedd 'Welsh Journeys' yn ymwneud â'i daith ar draws Mynyddoedd Preseli ar gefn ceffyl ac ysgrifennwyd 'The B Roads and By Ways of Wales' yn 2009, a oedd yn disgrifio blwyddyn o deithiau o amgylch y wlad.

Jamie yw un o'r siaradwyr mwyaf poblogaidd yn y DU, ac mae hefyd yn fedrus wrth lywyddu mewn llawer o ddigwyddiadau uchel-eu-proffil.